ଜନଶୁଣାଣିରେ ୨ ଚାଷୀଙ୍କ ଆତ୍ମହତ୍ୟା ଉଦ୍ୟମ, ଘଟଣାସ୍ଥଳରୁ ଉଭୟଙ୍କୁ କାବୁ କଲା ପୁଲିସ

ପଟ୍ଟାମୁଣ୍ଡାଇ, ଚେତନା ମିଡ଼ିଆ : ରାଜନଗର ବ୍ଲକ କାର୍ଯ୍ୟାଳୟରେ ଚାଲିଥିବା ଜିଲ୍ଲାପାଳଙ୍କ ଜନଶୁଣାଣି ସମୟରେ ଦୁଇ ଚାଷୀଙ୍କ ଚରମ ପ୍ରତିବାଦକୁ ନେଇ ଚର୍ଚ୍ଚା ସୃଷ୍ଟି ହୋଇଛି। ବେଆଇନ ଚିଙ୍ଗୁଡ଼ି ଘେରି ଯୋଗୁଁ ସମସ୍ୟା ଭୋଗୁଥିବା ଅଭିଯୋଗ କରି ତାଳଚୁଆ ଓ ଢୋଲମରା ଗାଁର ଦୁଇ ଚାଷୀ ଜନଶୁଣାଣିରେ ତୀବ୍ର ପ୍ରତିବାଦ କରି ଆତ୍ମହତ୍ୟା କରିବାଜୁ ଉଦ୍ୟମ କରିଥିଲେ। ପରିସ୍ଥିତି ଉତ୍ତେଜନାପୂର୍ଣ୍ଣ ହେବା ପୂର୍ବରୁ ପୁଲିସ ଉଭୟଙ୍କୁ ନିୟନ୍ତ୍ରଣକୁ ନେଇଥିଲା।

ଚାଷୀମାନଙ୍କ ଅଭିଯୋଗ ଅନୁଯାୟୀ, ଅଞ୍ଚଳରେ ଚାଲିଥିବା ବେଆଇନ ଚିଙ୍ଗୁଡ଼ି ଘେରି ଯୋଗୁଁ କୃଷିଜମି ଓ ପରିବେଶ ପ୍ରଭାବିତ ହେଉଛି। ଏନେଇ ପୂର୍ବରୁ ଅଭିଯୋଗ କରାଯାଇଥିଲେ ମଧ୍ୟ ଆଶାନୁରୂପ ପଦକ୍ଷେପ ନିଆଯାଇନଥିବା ନେଇ ସେମାନେ ଅସନ୍ତୋଷ ପ୍ରକାଶ କରିଥିଲେ।

ଜନଶୁଣାଣିରେ ଏଭଳି ଘଟଣା ପରେ ପ୍ରଶାସନ ପକ୍ଷରୁ ସ୍ଥିତି ସମ୍ପର୍କରେ ତଥ୍ୟ ନିଆଯାଇଛି। ବେଆଇନ ଚିଙ୍ଗୁଡ଼ି ଘେରି ସମ୍ପର୍କିତ ଅଭିଯୋଗର ତଦନ୍ତ ସହ ଆବଶ୍ୟକ ପଦକ୍ଷେପ ନେବାକୁ ଦାବି ଜୋର ଧରିଛି।