ଗ୍ରେନ୍ ଗାର୍ଡ’ରେ ଶସ୍ୟ ସୁରକ୍ଷାର ନୂଆ ଚିନ୍ତା: ଜାତୀୟ ମଞ୍ଚକୁ ପ୍ରତ୍ୟୁଷା,ରାଜ୍ୟସ୍ତରୀୟ ବାଳ ବୈଜ୍ଞାନିକ ପ୍ରଦର୍ଶନୀରେ ପ୍ରଥମ; ଅହମଦାବାଦରେ ଓଡ଼ିଶାକୁ କରିବେ ପ୍ରତିନିଧିତ୍ୱ
ରାଜ୍ୟସ୍ତରୀୟ ବାଳ ବୈଜ୍ଞାନିକ ପ୍ରଦର୍ଶନୀରେ ପ୍ରଥମ; ଅହମଦାବାଦରେ ଓଡ଼ିଶାକୁ କରିବେ ପ୍ରତିନିଧିତ୍ୱ
ପାତ୍ରପୁର: ଛୋଟ ମନର ବଡ଼ ଚିନ୍ତା। ଚାଷୀଙ୍କ ଶସ୍ୟ ସୁରକ୍ଷା ସହ ସ୍ଥାୟୀ କୃଷିର ଭବିଷ୍ୟତକୁ ନେଇ ନବମ ଶ୍ରେଣୀର ଜଣେ ଛାତ୍ରୀଙ୍କ ଅଭିନବ ପରିକଳ୍ପନା ଏବେ ଜାତୀୟ ମଞ୍ଚରେ ପହଞ୍ଚିଛି। ‘ଗ୍ରେନ୍ ଗାର୍ଡ’ ନାମକ ବୈଜ୍ଞାନିକ ପ୍ରକଳ୍ପ ପାଇଁ ଗଞ୍ଜାମ ଜିଲ୍ଲା ପିଏମ୍ ଶ୍ରୀ ଜବାହର ନବୋଦୟ ବିଦ୍ୟାଳୟ, ସୁରଙ୍ଗୀର ନବମ ଶ୍ରେଣୀ ଛାତ୍ରୀ କୁମାରୀ ପ୍ରତ୍ୟୁଷା ପ୍ରଧାନ ରାଜ୍ୟସ୍ତରୀୟ ବାଳ ବୈଜ୍ଞାନିକ ପ୍ରଦର୍ଶନୀରେ ପ୍ରଥମ ସ୍ଥାନ ଅର୍ଜନ କରି ଗୌରବ ଆଣିଛନ୍ତି। ଏହି ସଫଳତା ସହ ସେ ଜାତୀୟସ୍ତରୀୟ ବାଳ ବୈଜ୍ଞାନିକ ପ୍ରତିଯୋଗିତାରେ ଓଡ଼ିଶାର ପ୍ରତିନିଧିତ୍ୱ କରିବାର ଗୌରବ ହାସଲ କରିଛନ୍ତି।
୨୦୨୬–୨୭ ଶିକ୍ଷାବର୍ଷର ରାଜ୍ୟସ୍ତରୀୟ ବାଳ ବୈଜ୍ଞାନିକ ପ୍ରଦର୍ଶନୀରେ ଭୁବନେଶ୍ୱର ଅଞ୍ଚଳରୁ ଅଂଶଗ୍ରହଣ କରି ପ୍ରତ୍ୟୁଷା ନିଜର ‘ଗ୍ରେନ୍ ଗାର୍ଡ’ ପ୍ରକଳ୍ପ ପ୍ରଦର୍ଶନ କରିଥିଲେ। ସ୍ଥାୟୀ କୃଷି ଓ ଶସ୍ୟ ସୁରକ୍ଷାକୁ କେନ୍ଦ୍ର କରି ପ୍ରସ୍ତୁତ ଏହି ପ୍ରକଳ୍ପର ଅଭିନବ ଚିନ୍ତାଧାରା, ବ୍ୟବହାରିକ ଉପଯୋଗିତା ଓ ଚମତ୍କାର ଉପସ୍ଥାପନା ବିଚାରକମଣ୍ଡଳୀଙ୍କ ଦୃଷ୍ଟି ଆକର୍ଷଣ କରିଥିଲା। ଫଳରେ ପ୍ରତିଦ୍ୱନ୍ଦ୍ୱିତାରେ ସମସ୍ତଙ୍କୁ ପଛରେ ପକାଇ ପ୍ରଥମ ସ୍ଥାନ ହାତେଇଥିଲେ ପ୍ରତ୍ୟୁଷା।
ରାଜ୍ୟସ୍ତରର ଏହି ଉଲ୍ଲେଖନୀୟ ସଫଳତା ପରେ ଏବେ ତାଙ୍କ ନଜର ଜାତୀୟ ମଞ୍ଚ ଉପରେ। ଜାତୀୟସ୍ତରୀୟ ପ୍ରତିଯୋଗିତାରେ ଓଡ଼ିଶାର ପ୍ରତିନିଧି ଭାବେ ଅଂଶଗ୍ରହଣ ପାଇଁ ସେ ଗୁଜରାଟର ଅହମଦାବାଦସ୍ଥିତ ଜବାହର ନବୋଦୟ ବିଦ୍ୟାଳୟ ଅଭିମୁଖେ ଯାତ୍ରା କରିଛନ୍ତି। ସେଠାରେ ଦେଶର ବିଭିନ୍ନ ପ୍ରାନ୍ତରୁ ଆସିଥିବା ପ୍ରତିଭାବାନ୍ ବାଳ ବୈଜ୍ଞାନିକଙ୍କ ମଧ୍ୟରେ ସେ ନିଜ ପ୍ରକଳ୍ପର ପ୍ରଦର୍ଶନ କରିବେ।
ପ୍ରତ୍ୟୁଷାଙ୍କ ଏହି ସଫଳତା ପଛରେ ବିଦ୍ୟାଳୟର ଶିକ୍ଷୟିତ୍ରୀଙ୍କ ମାର୍ଗଦର୍ଶନ ମଧ୍ୟ ଉଲ୍ଲେଖନୀୟ। ପ୍ରକଳ୍ପ ପ୍ରସ୍ତୁତି ସମୟରେ ବିଦ୍ୟାଳୟର ପିଜିଟି (ବାୟୋଲୋଜି) ଶିକ୍ଷୟିତ୍ରୀ ସ୍ୱର୍ଣ୍ଣପ୍ରଭା ମହାପାତ୍ର ପ୍ରତ୍ୟୁଷାଙ୍କୁ ଆବଶ୍ୟକ ପରାମର୍ଶ, ମାର୍ଗଦର୍ଶନ ଓ ପ୍ରୋତ୍ସାହନ ଯୋଗାଇଥିଲେ। ଛାତ୍ରୀଙ୍କ ବୈଜ୍ଞାନିକ ଚିନ୍ତାଧାରାକୁ ଉତ୍ସାହିତ କରିବା ସହ ପ୍ରକଳ୍ପକୁ ଅଧିକ ବ୍ୟବହାରିକ ଓ ଆକର୍ଷଣୀୟ କରିବାରେ ତାଙ୍କ ମାର୍ଗଦର୍ଶନ ସହାୟକ ହୋଇଥିଲା।
ପ୍ରତ୍ୟୁଷାଙ୍କ ଏହି କୃତିତ୍ୱରେ ପିଏମ୍ ଶ୍ରୀ ଜବାହର ନବୋଦୟ ବିଦ୍ୟାଳୟ, ସୁରଙ୍ଗୀରେ ଖୁସିର ମାହୋଲ ସୃଷ୍ଟି ହୋଇଛି। ବିଦ୍ୟାଳୟର ଅଧ୍ୟକ୍ଷଙ୍କ ସମେତ ସମସ୍ତ ଶିକ୍ଷକ-ଶିକ୍ଷୟିତ୍ରୀ ଓ କର୍ମଚାରୀ ପ୍ରତ୍ୟୁଷାଙ୍କୁ ଅଭିନନ୍ଦନ ଜଣାଇବା ସହ ଜାତୀୟସ୍ତରରେ ମଧ୍ୟ ଶ୍ରେଷ୍ଠ ପ୍ରଦର୍ଶନ କରି ବିଦ୍ୟାଳୟ, ଗଞ୍ଜାମ ଓ ଓଡ଼ିଶାର ଗୌରବ ବଢ଼ାଇବାକୁ ଶୁଭେଚ୍ଛା ଜଣାଇଛନ୍ତି।
‘ଗ୍ରେନ୍ ଗାର୍ଡ’ କେବଳ ଏକ ବିଜ୍ଞାନ ପ୍ରକଳ୍ପ ନୁହେଁ, ଚାଷ ଓ ଶସ୍ୟ ସୁରକ୍ଷାକୁ ନେଇ ଜଣେ କିଶୋରୀଙ୍କ ଦୂରଦୃଷ୍ଟିର ପ୍ରତିଫଳନ। ରାଜ୍ୟସ୍ତରରୁ ଜାତୀୟ ମଞ୍ଚ ପର୍ଯ୍ୟନ୍ତ ପ୍ରତ୍ୟୁଷାଙ୍କ ଏହି ଯାତ୍ରା ଗଞ୍ଜାମର ଛାତ୍ରଛାତ୍ରୀଙ୍କ ମଧ୍ୟରେ ବୈଜ୍ଞାନିକ ଚିନ୍ତନ ଓ ନବସୃଜନର ଆଶାକୁ ଆହୁରି ଉଜ୍ଜ୍ୱଳ କରିଛି।