ଖଡ୍ଗ ନଦୀରେ ଡଙ୍ଗା ଓଲଟି ୨ ନିଖୋଜ, ଶ୍ୱଶୁର-ବୋହୂଙ୍କ ସନ୍ଧାନ ମିଳୁନି
ଖଡ୍ଗ ନଦୀରେ ଡଙ୍ଗା ଓଲଟି ୨ ନିଖୋଜ, ଶ୍ୱଶୁର-ବୋହୂଙ୍କ ସନ୍ଧାନ ମିଳୁନି
ବାଲିଗୁଡ଼ା: ବାଲିଗୁଡ଼ା ଥାନା ସଲାଗୁଡ଼ା ପଞ୍ଚାୟତ ଡାକା ଗାଁ ନିକଟ ଖଡ୍ଗ ନଦୀରେ ଡଙ୍ଗା ଓଲଟି ୨ ଜଣ ନିଖୋଜ ହୋଇଛନ୍ତି। ନଦୀ ମଝିରେ ଭାରସାମ୍ୟ ହରାଇ ଡଙ୍ଗାଟି ଓଲଟି ପଡ଼ିବାରୁ ପ୍ରଖର ସ୍ରୋତରେ ୮ ଜଣ ଯାତ୍ରୀ ଭାସିଯାଇଥିଲେ। ସ୍ଥାନୀୟ ଲୋକେ ତୁରନ୍ତ ଉଦ୍ଧାର କରି ୬ ଜଣଙ୍କୁ ସୁରକ୍ଷିତ କରିଥିବାବେଳେ ଶ୍ୱଶୁର-ବୋହୂଙ୍କ ସନ୍ଧାନ ମିଳିପାରିନାହିଁ।
ନିଖୋଜ ଦୁଇଜଣ ହେଲେ ବାଲିଗୁଡ଼ା ଥାନା ପଲାମୀ ଗାଁର ଗୁନ୍ଦାନା ମଳିକ ଓ ତାଙ୍କ ବୋହୂ ରାଇଙ୍ଗୀ ମଳିକ। ସୂଚନା ଅନୁସାରେ, ଗୁନ୍ଦାନାଙ୍କ ପରିବାର ଫିରିଙ୍ଗିଆ ଥାନା ସମରବନ୍ଧ ପଞ୍ଚାୟତ ଏଜକ ଗାଁରେ ଏକ ଶୁଦ୍ଧ କାର୍ଯ୍ୟକ୍ରମରେ ଯୋଗଦେବାକୁ ଯାଇଥିଲେ। କାର୍ଯ୍ୟକ୍ରମ ସାରି ଡଙ୍ଗା ଯୋଗେ ଖଡ୍ଗ ନଦୀ ପାର ହୋଇ ନିଜ ଗାଁକୁ ଫେରୁଥିବା ସମୟରେ ନଦୀ ମଝିରେ ହଠାତ୍ ଡଙ୍ଗାଟି ଭାରସାମ୍ୟ ହରାଇ ଓଲଟି ପଡ଼ିଥିଲା।
ଘଟଣା ପରେ ନଦୀର ପ୍ରଖର ସ୍ରୋତରେ ଯାତ୍ରୀମାନେ ଭାସିଯାଇଥିଲେ। ସ୍ଥାନୀୟ ଲୋକେ ସାହସିକତାର ସହ ଉଦ୍ଧାର କାର୍ଯ୍ୟ କରି ୬ ଜଣଙ୍କୁ ଉଦ୍ଧାର କରିଥିଲେ। ତେବେ ଗୁନ୍ଦାନା ଓ ରାଇଙ୍ଗୀଙ୍କ କୌଣସି ପତ୍ତା ମିଳିନଥିଲା।
ଖବର ପାଇ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ନଦୀରେ ଖୋଜାଖୋଜି ଆରମ୍ଭ କରିଥିଲା। ଗତକାଲି ଦୀର୍ଘ ସମୟ ଧରି ଉଦ୍ଧାରକାରୀ ଦଳ ଖୋଜାଖୋଜି କରିଥିଲେ ମଧ୍ୟ ଉଭୟ ନିଖୋଜଙ୍କ ସନ୍ଧାନ ମିଳିପାରିନାହିଁ। ପ୍ରଖର ଜଳସ୍ରୋତ ଯୋଗୁଁ ଉଦ୍ଧାର କାର୍ଯ୍ୟରେ ସମସ୍ୟା ଉପୁଜିଥିବା ଜଣାପଡ଼ିଛି। ଘଟଣାକୁ ନେଇ ପରିବାର ଓ ସ୍ଥାନୀୟ ଅଞ୍ଚଳରେ ଚିନ୍ତା ଓ ଶୋକର ବାତାବରଣ ଦେଖାଦେଇଛି।