ବଳାତ୍କାର ମାମଲାରେ ଫେରାର ପୁଲିସ ଇନ୍ସପେକ୍ଟରଙ୍କୁ ଧରିବାକୁ ଚଢ଼ଉ
ସରଣକୁଳ ଥାନାର ପୂର୍ବତନ ଆଇଆଇସି ସୁଜିତ କୁମାର ଦାସଙ୍କ ବିରୋଧରେ ଜାରି ହୋଇଛି ଅଜାମିନଯୋଗ୍ୟ ପରୱାନା
ନୟାଗଡ଼, ଚେତନା ମିଡ଼ିଆ : ବଳାତ୍କାର ମାମଲାରେ ଫେରାର ଥିବା ସାରଣକୁଳ ଥାନାର ପୂର୍ବତନ ଆଇଆଇସି ସୁଜିତ କୁମାର ଦାସଙ୍କୁ ଗିରଫ କରିବା ପାଇଁ ତଦନ୍ତ ଜୋରଦାର କରିଛି ଓଡ଼ିଶା କ୍ରାଇମବ୍ରାଞ୍ଚ। ଓଡ଼ଗାଁ କୋର୍ଟ ପକ୍ଷରୁ ତାଙ୍କ ବିରୋଧରେ ଅଜାମିନଯୋଗ୍ୟ ପରୱାନା (ନନ୍-ବେଲେବଲ୍ ୱାରେଣ୍ଟ) ଜାରି ହେବା ପରେ କ୍ରାଇମବ୍ରାଞ୍ଚ ତାଙ୍କୁ ଖୋଜିବା ପାଇଁ ବିଭିନ୍ନ ସ୍ଥାନରେ ଚଢ଼ଉ ଆରମ୍ଭ କରିଛି।
ସୂଚନାନୁସାରେ, ସୁଜିତ କୁମାର ଦାସ କିଛି ସମୟ ହେଲା ଫେରାର ଥିବା ଜଣାପଡ଼ିଛି। ତାଙ୍କୁ ଯେକୌଣସି ପରିସ୍ଥିତିରେ ଗିରଫ କରିବାକୁ ପୁଲିସକୁ ନିର୍ଦ୍ଦେଶ ଦିଆଯାଇଥିବା କ୍ରାଇମବ୍ରାଞ୍ଚ ଅତିରିକ୍ତ ଏସ୍ପି ଏସ୍.କେ. ପଣ୍ଡା କହିଛନ୍ତି। ତାଙ୍କ ସମ୍ଭାବ୍ୟ ଠିକଣା ସମ୍ପର୍କରେ ତଥ୍ୟ ସଂଗ୍ରହ କରାଯିବା ସହ ବିଭିନ୍ନ ସ୍ଥାନରେ ଖୋଜାଖୋଜି ଚାଲିଛି।
ଘଟଣାର ସୂତ୍ରପାତ ଜୁନ୍ ମାସରେ। ସେତେବେଳେ ସୁଜିତ ଦାସ ସାରଣକୁଳ ଥାନାର ଆଇଆଇସି ଭାବେ କାର୍ଯ୍ୟରତ ଥିଲେ। ଜଣେ ମହିଳା ତାଙ୍କ ବିରୋଧରେ ଯୌନ ନିର୍ଯାତନା ସମ୍ପର୍କିତ ଅଭିଯୋଗ ଆଣିଥିଲେ। ଅଭିଯୋଗ ପରେ ତାଙ୍କୁ ନୟାଗଡ଼ ଜିଲ୍ଲା ମୁଖ୍ୟାଳୟକୁ ବଦଳି କରାଯାଇଥିଲା। ପରବର୍ତ୍ତୀ ସମୟରେ ଡିଜିପି ତାଙ୍କୁ ନିଲମ୍ବନ କରିଥିଲେ।
ମାମଲାରେ ସୁଜିତ ଦାସ ଓଡ଼ିଶା ହାଇକୋର୍ଟରୁ ଅନ୍ତରୀଣ ଜାମିନ ହାସଲ କରିଥିଲେ। ତେବେ ଅଗଷ୍ଟ ମାସରେ ପୁଲିସ ପକ୍ଷରୁ ମାମଲାରେ ମଜବୁତ ପ୍ରମାଣ ଓ ସାକ୍ଷୀ ଉପସ୍ଥାପନ କରାଯିବା ପରେ ହାଇକୋର୍ଟ ତାଙ୍କୁ ମିଳିଥିବା ଅନ୍ତରୀଣ ସୁରକ୍ଷା ପ୍ରତ୍ୟାହାର କରିଥିବା ଜଣାପଡ଼ିଛି।
ଏହାପରେ ମାମଲାର ଗୁରୁତ୍ୱ ବଢ଼ିବା ସହ ଓଡ଼ଗାଁ କୋର୍ଟ ତାଙ୍କ ବିରୋଧରେ ଅଜାମିନଯୋଗ୍ୟ ପରୱାନା ଜାରି କରିଛନ୍ତି। ଏବେ କ୍ରାଇମବ୍ରାଞ୍ଚ ତାଙ୍କୁ ଗିରଫ କରିବା ପାଇଁ ତନାଘନା ଚଳାଇଛି। “ତାଙ୍କୁ ଯଥାଶୀଘ୍ର ଗିରଫ କରିବା ପାଇଁ ସମସ୍ତ ପ୍ରୟାସ କରାଯାଉଛି” ବୋଲି ଅତିରିକ୍ତ ଏସ୍ପି ଏସ୍.କେ. ପଣ୍ଡା କହିଛନ୍ତି।
ପୁଲିସ ବିଭାଗର ଜଣେ ଅଧିକାରୀଙ୍କ ବିରୋଧରେ ଏପରି ଗୁରୁତର ଅଭିଯୋଗ ଓ ତାଙ୍କ ବିରୋଧରେ ଅଜାମିନଯୋଗ୍ୟ ପରୱାନା ଜାରି ହେବା ଘଟଣା ଆଇନଶୃଙ୍ଖଳା ବ୍ୟବସ୍ଥା ଉପରେ ମଧ୍ୟ ଗୁରୁତର ପ୍ରଶ୍ନ ଉଠାଇଛି। ଏବେ କ୍ରାଇମବ୍ରାଞ୍ଚର ମୁଖ୍ୟ ଲକ୍ଷ୍ୟ ହେଉଛି ଫେରାର ଅଭିଯୁକ୍ତଙ୍କୁ ଗିରଫ କରି ମାମଲାର ପରବର୍ତ୍ତୀ ଆଇନଗତ ପ୍ରକ୍ରିୟାକୁ ଆଗେଇ ନେବା।